Тошкент, Ўзбекистон (UzDaily.uz) — Мажлисда интеллектуал мулк объектларини рўйхатдан ўтказиш тартибини соддалаштиришга қаратилган қонун лойиҳаси қизғин муҳокамаларга сабаб бўлди.

Мамлакатимизда аҳолининг, шу жумладан, тадбиркорлик субъектларининг интеллектуал мулк соҳасидаги хабардорлик даражасини ошириш, яратилган интеллектуал фаолият натижаларини муҳофаза қилиш жараёнларини рақамлаштириш орқали ортиқча талабларни бекор қилиш бўйича кенг кўламли ислоҳотлар амалга оширилмоқда. Ушбу қонун лойиҳаси билан ҳам саноат мулки объектларини рўйхатдан ўтказиш жараёнларида талаб қилинадиган давлат божи тўланганлигини тасдиқловчи ҳужжатларни тақдим этишни бекор қилиш таклиф этилмоқда.

Шунингдек, лойиҳада электрон ҳисоблаш машиналари учун дастурларни ва маълумотлар базаларини расмий рўйхатдан ўтказиш учун тақдим этилган талабнома ва унга илова қилинган ҳужжатларни белгиланган талабларга мувофиқлигини текшириш муддатини 10 кун этиб белгилаш назарда тутиляпти.

Интеллектуал мулк объектларига бўлган ҳуқуқларни тасдиқловчи муҳофаза ҳужжатларини эса ягона ҚР-код (матрик штрихли код) қўйилган ҳолда электрон шаклда автоматик тарзда бериш белгиланмоқда.

Бундан ташқари, товар келиб чиққан жой номини ва (ёки) товар келиб чиққан жой номидан фойдаланиш ҳуқуқини рўйхатдан ўтказишга доир талабномада ифодаланган белгини экспертизадан ўтказиш муддатини етти ойдан бир ойга қисқартириш, интеллектуал мулк объектини рўйхатдан ўтказишда давлат божини тўлаш учун белгиланган уч ойлик муддат ўтказиб юборилганда, уни қўшимча тўлов эвазига (патент божининг 50 фоизи) олти ойгача узайтириш назарда тутилмоқда.

Мажлисда қонун лойиҳасини иккинчи ўқишга тайёрлаш давомида сиёсий партиялар фракциялари, депутатлар томонидан берилган барча таклифлар ишчи гуруҳ йиғилишларида чуқур таҳлил қилиниб, улар асосида ҳужжат матни такомилига етказилгани алоҳида қайд этилди.

Депутатларнинг айтишича, қонун лойиҳасининг қабул қилиниши мамлакатимизнинг иқтисодий ривожланишига ва инновацион жиҳатдан юксалишига самарали таъсир кўрсатувчи интеллектуал мулк тизимини шакллантириш ҳамда интеллектуал фаолият натижалари эгаларига ўз интеллектуал мулк объектларини муҳофаза қилиш учун қулай шарт-шароитлар яратишга хизмат қилади.

Мажлисда қонун лойиҳаси депутатлар томонидан иккинчи ўқишда қабул қилинди.