Тошкент, Ўзбекистон (UzDaily.uz) — Буюк Британия Мудофаа вазирлигининг Лордлар палатаси бўйича Давлат вазири Лорд Коакер Ўзбекистонга муваффақиятли ташрифини якунлади. Ташрифнинг мақсади икки томонлама мудофаа алоқаларини мустаҳкамлаш ва чуқур ҳамкорлик имкониятларини ўрганишдан иборат бўлди. Бу Лорд Коакернинг Марказий Осиёга илк ташрифи бўлиб, янги Британия ҳукумати вакили томонидан Ўзбекистонга амалга оширилган биринчи ташриф ҳам ҳисобланади.

Ташриф давомида вазир Коакер ўзбекистонлик асосий ҳамкорлар, жумладан Мудофаа вазири ўринбосари генерал-лейтенант Ҳамдам Каршиев ва Миллий гвардия қўмондони генерал-лейтенант Рустам Жўраев билан учрашувлар ўтказди. Учрашувларда Буюк Британиянинг Ўзбекистон билан икки томонлама мудофаа ҳамкорлигини ривожлантириш ва чуқурлаштириш борасидаги қатъияти яна бир бор тасдиқланди.

Ташрифнинг асосий воқеаларидан бири – вазир Коакернинг Ўзбекистон Қуролли Кучлари Академиясида қилган нутқи бўлди. Бу Британия мудофаа вазири томонидан ушбу академияда сўзлаган биринчи нутқ бўлиб, у ўз нутқида сўнгги 30 йил давомидаги Буюк Британия – Ўзбекистон мудофаа ҳамкорлигининг аҳамиятига урғу берди ва ҳарбий таълим бу муносабатларни мустаҳкамлашдаги муҳим омил эканини таъкидлади. 

“Ушбу ташриф Ўзбекистон билан мудофаа соҳасидаги алоқаларимизда муҳим қадам бўлди,” деди вазир Коакер. “Минтақада хавфсизлик ва барқарорликни мустаҳкамлаш учун ўзбекистонлик ҳамкорларимиз билан яқин ҳамкорликда ишлашга содиқмиз. Биз умумий қадриятларимиз ва халқаро хавфсизликка бўлган ёндашувларимиз келгусида ҳамкорлигимизни кучайтиришда давом этишига ишонамиз.”