Тошкент, Ўзбекистон (UzDaily.uz) — 2025 йил 12 май куни Ўзбекистон Республикаси Ташқи ишлар вазирлигида Ташқи ишлар вазири Бахтиёр Саидовнинг Европа Иттифоқининг Марказий Осиё бўйича махсус вакили Эдуард Стипрайс билан учрашуви бўлиб ўтди.

Музокаралар чоғида томонлар Ўзбекистон ва Европа Иттифоқи ўртасида ўзаро манфаатли ҳамкорликни янада мустаҳкамлашга қатъий интилиш мавжудлигини тасдиқладилар. Хусусан, Самарқандда бўлиб ўтган “Марказий Осиё — Европа Иттифоқи” Саммити доирасида эришилган келишувларни амалга ошириш масалаларига алоҳида эътибор қаратилди. Ушбу саммит минтақалараро мулоқотни ривожлантиришда муҳим босқич бўлгани таъкидланди.

Суҳбат давомида томонлар икки томонлама ва минтақавий кун тартибидаги кенг кўламли масалаларни муҳокама қилдилар, жумладан, таълим, барқарор ривожланиш, сув хавфсизлиги, атроф-муҳитни муҳофаза қилиш, рақамлаштириш ва “яшил” энергетика соҳаларидаги ҳамкорлик масалалари кўриб чиқилди.

Шунингдек, жорий халқаро ва минтақавий чақириқлар юзасидан фикр алмашилди.

Мулоқот суръатини сақлаш ва ўзаро манфаатли барча йўналишлар бўйича амалий ҳамкорликни кенгайтириш муҳимлиги алоҳида таъкидланди.

Учрашув якунида томонлар сиёсий мулоқотни фаол давом эттириш ва ишонч, очиқлик ҳамда ўзаро ҳурмат руҳида шерикликни мустаҳкамлашга тайёр эканликларини билдирдилар.